|
Gabayii Halgaad
Dhoodaan isagoo jooga magaalada Addis Ababa, dabayaaqadii
sanadkii 1979 kii, oo galabtaas ku qayilaya Hotel Harar, ayaa
waxaa qolkiisa ugu yimid nin ka mid ahaa saraakiishii ciidamada
Soomaaliya, ee intii ay dhaawacmeen goobihii dagaalka lagag
cararay, ciidamadii Itoobiyaan kuna ay qabteen, markaana magaalada
Addis Ababa ku noolaa isagoo dhaawicii ka bogsaday. Ninkaas
sargaalka ahaa waxaa magiciisa la odhan jiray Dhamme Xuseen
Jaamac.
Markii waxoogaa Dhoodaan raggii
la fadhiyay ay sheekaysteen, ayuu Dhoodan tiriyay gabaygan
"Halgaad". Sida uu Dhoodaan qoraha Buugga Garnaqsi
usheegay Mohamed Gurxan. in uusan Dhoodaan raali ka ahayn
in uu tiriyo gabaygan, hase yeeshee cadhadii uu ka cadhooday
sidii foosha xumayd ee ciidamadii Soomaalidu uga carareen
dhukii ay qabsadeen & dadkii dhulka daganaa ee shacabka
ahaa waxyeeladdii xoogga lahayd ee ka soo gaadhay cararkaas,
ayay ahayd sababta ku kaliftay in uu tiriyo gabaygan.
-----------------------------------------------------------------------------
Rag hawaystay qaar kale hantidood oo habaabinayey
Hindisay wateen lagu hirgalin himiladoodaase
Wax la yidhi habeen niman dhac iyo bowdfur ku heshiiyey
Hayin reer intay xadahayeen ama horweynkooda
Hablahoodii qaarbaa hurwiyo hello sii tumaye
Hadda waxaa hilaadeed ku yimid ama hannaankii leh
Soomaaliya intay ku hamiyeen say u hano qaado
Iyagoo markaa nala hubsaday dawladii hurudday
Xafiis iyo hareertana ma garan hogagii xeeleede
Markay horror kasoo hoyo tidhiye haasta nagu qaaday
Hoboow heeda waagay tuntaye nagu hilaabowday
Hiyi kaca danaysiga aheey nagu hanqaaraysay
Hal-jir iyo nin harag dhoofsadiyo beer ku haramaysta
Habarwacashadoodii intaan laba ka haasaawin
Hawhawdii Xamar ee sidaa noo hawadinaysay
Hantaqa waa markaan ugu dhacniyo goof hadoodilane
Huf iyo been hadh kaga saar ah bay nagu hungeeyeene
Hoheey waxaad habheebta u gasheen waa isku halayne
Dadkeenii hayaamayee xagaa loo habqaminaayey
Waa isaga hanbaabicin jiree waxa u hooseeyay
Hanbooriba inay nagu wadaan oo hurgumo jiifto
Oo halaag Soomaaliya tihiyo halis inoo baaqday
Lama hadin hubsada ee aayar baa loo hogaansamaye
Hoheey waxaad habheebta u gasheen waa isku halayne
Haligaad inay nala damceen had iyo goor taagan
Hingalahay dadkeena u xidheen haatan ood aragtay
Wali hanuunsigiyo beentii bay daba hublayn qaare
Rag haydaartadeenuba u tahay halabadii guusha
Hamhamtiyo warkoodii aan jirin kama hadhaysaane
Hoheey waxaad habheebta u gasheen waa isku halayne
Keenaa hulaaban baydin hodoo hiiqin waligiise
Markaasaad hadhuub caano iyo hilibba siisaane
Hararkiyo darmana loo gogloo hadhacaad waabtaane
Hadhuudh iyo qaxwana loo karshey habacsan dhay geele
Ragna habadka waxa nooga dhigi waa hangoolada e
Hubkaad sidato badow haysta iyo hoorri kugu dheelye
Isagoon hallaba kuu ogayn jaahil ku halleyay
Oo idiin hanjabayaad waqiin u habranaysaane
Hus baad odhan lahaydeene waa leys hagranayaaye
Hadhowto iyo Soomaaliyaad haybadda u siine
Hiiraan iyo Hargaysiyo asgari dhaafay hilinkooda
Oo haadkaagii soo galay markaad hiil u daydayato
Haladaad haday nagu tumeen hubanti waad siine
Hobyo iyo hadday tuuga Xamar idin halaakaysan
Halkana qaaqlihiinii ka tagay lagu hagaagaynin
Umad hoogi baad ila tihiin huuti yahay baase
Garashiyo haddaad hadur ka tahay maamul heer sareba
Gobonimadaad haabhaaban ee lagu hadaaqaayey
Haddaan hororba laga waabiyeen kugu haliilaaya
Maba hanan karayside maxaa taana laga haybsan?
Hayeeshee haddaad ku hamidaan hodonso ciidaada
Halyeynimana lays bidahayood haysan kari doonto
Hanti waaba lagu leeyahiyo hoo adays ka lehe
War heelada iblayskaa mindhaa idin halmaansiine
Muqdishadii habeediyo qalbiga haarufta u yeeshay
Hanbaggiyo war ay kugu qubtaad hooy u leedahaye
Haloosiga Af-weyniyo jinbaad la hidiwaasteene
Wixii idin haboowshaa badhkiin sii hiigsanayaane
Hagaga looma baahnee haddaad hubanti doonayso
Xukuumadaa haraadka u bakhtiday way hantaaticiye
War hawl yari dhulkay maaganayd inay ku haaneedo
Ee habeenno shicibkii lahaa lagu hor maalaayey
Inkastoo dad yari howd galay oo taagii hudinaayey
Halaqiyo hangaralahuu dirtiyo haramacadku waashay
Humaajooyin way nagu dhufteen haayirka i boobay
Hollin ma aha koobaade way nagu halaaqeene
Annagoo habsoow nagu dhacayoo hiil isaga baahan
Hanadadii Ogaadeenya oon waxba iskuba hawlin
Horusocodkay noo soo dirtoo haaligaa yimide
Horimada malaysiyada iyo wiilashii hudmaaye.
Buugga Garnaqsi
M Ibrahim
Qorahay Online
Afeef: Suugaanta
& Gabayadan ay Qorahay Online idiin so ban dhigayso waxaanu uga jednaa Taariikh oo kali ah
Fadlan hadaad xiisaynayso in aad
suugaanta ka qayb qaadatid waxaan kaa codsanaynaa in aad
noso gudbisid wixii suugaan aad haysid. Waxaadna nagala
so xidhidhi kartaa ciwaankan suugaan@qorahay.com
|
